घरगुती कामगार संघटनेत नांदेडचा मान उंचावला; कॉ. करवंदा गायकवाड यांची राज्य सहसचिवपदी निवड

 नांदेड : सीटू संलग्न महाराष्ट्र राज्य घरकामगार संघटनेच्या जिल्हा सरचिटणीस कॉ. करवंदा गायकवाड यांची राज्य कमिटीच्या सहसचिवपदी निवड होऊन नांदेड जिल्ह्याचा लौकिक वाढला आहे. नाशिकमधील सीटू भवन, खुटवडनगर, सातपूर येथे पार पडलेल्या तिसऱ्या राज्य अधिवेशनात ही निवड एकमताने करण्यात आली.

उपरोक्त अधिवेशनास नांदेड जिल्ह्यातून तीन प्रतिनिधींनी सहभाग नोंदवला. अधिवेशनाचे उदघाटन सीटूचे राष्ट्रीय उपाध्यक्ष व राज्य अध्यक्ष कॉ. डॉ. डी.एल. कराड यांनी केले. राज्यातील विविध भागातील पदाधिकारी व प्रतिनिधी मोठ्या संख्येने उपस्थित होते.

२४ नोव्हेंबर रोजी संपन्न झालेल्या अधिवेशनात राज्य अध्यक्षा म्हणून कॉ. अॅड. आरमायटी इराणी तर राज्य सरचिटणीस म्हणून कॉ. किरण मोघे यांची पुन्हा एकमताने फेरनिवड झाली. यावेळी नांदेड जिल्ह्याच्या कॉ. करवंदा गायकवाड यांची राज्य सहसचिवपदी आणि कॉ. गंगाधर गायकवाड यांची राज्य कमिटी सदस्य म्हणून निवड करण्यात आली.

कॉ. करवंदा गायकवाड या सीटूच्या लढाऊ व सक्रीय कार्यकर्त्या म्हणून ओळखल्या जातात. त्यांच्या नेतृत्वाखाली जिल्ह्यात तसेच राज्यात अनेक आक्रमक व यशस्वी आंदोलनांची नोंद आहे. त्यांच्या राज्यस्तरीय निवडीमुळे संघटनेत उत्साहाचे वातावरण असून विविध स्तरांतून त्यांच्यावर अभिनंदनांचा वर्षाव होत आहे.