गझलकार चंद्रकांत कदम यांना “संवेदना राज्यस्तरीय साहित्यरत्न पुरस्कार” जाहीर!

 

हिमायतनगर‌: आजच्या अस्थिर व विस्कळीत सामाजिक वातावरणात वाचन संस्कृतीला नवी दिशा देण्यासाठी संवेदना फाऊंडेशन आणि महाराष्ट्र पर्व लाईव्ह न्यूज (MPL News) यांच्या संयुक्त विद्यमाने कालवश उत्तमराव पंडित यांच्या स्मरणार्थ “संवेदना राज्यस्तरीय साहित्यरत्न पुरस्कार” सुरू करण्यात आले असून, या पहिल्याच वर्षी या पुरस्कारासाठी नांदेडचे सुप्रसिद्ध गझलकार चंद्रकांत देवराव कदम (सन्मित्र) यांच्या “समतेच्या डोहाकाठी” या गझलसंग्रहाची निवड झाली आहे.

या साहित्यरत्न पुरस्कारासाठी राज्यभरातील साहित्यिकांकडून उत्स्फूर्त प्रतिसाद लाभला. सर्वोत्तम गझलसंग्रह म्हणून निवड झालेल्या या काव्यसंग्रहाचे प्रकाशन गझलनवाज भीमराव पांचाळे यांच्या हस्ते झाले होते. या संग्रहाला याआधीही विविध पुरस्कारांनी गौरविण्यात आले आहे.

गझलकार चंद्रकांत कदम हे उच्च शिक्षित, उपक्रमशील शिक्षक असून सध्या जि.प. हायस्कूल, जवळगाव (ता. हिमायतनगर) येथे कार्यरत आहेत. संवेदनशील गझलकार, प्रभावी सूत्रसंचालक आणि साहित्यसेवक म्हणून त्यांचा राज्यभर लौकिक आहे.

सर्व पुरस्कारार्थींचा सत्कार समारंभ ५ नोव्हेंबर २०२५ रोजी हिमायतनगर येथे मोठ्या उत्साहात पार पडणार असून, कदम यांच्या या सन्मानाबद्दल साहित्यविश्वातून आणि त्यांच्या चाहत्यांकडून हार्दिक अभिनंदनाचा वर्षाव होत आहे.