शारीरिक शिक्षेला आळा घालण्यासाठी ‘सकारात्मक शिस्त’ गरजेची
– गट शिक्षणाधिकारी अनिलकुमार महामुने
किनवट : विद्यार्थ्यांवरील शारीरिक शिक्षेच्या वाढत्या घटनांमुळे समाजात चिंता व्यक्त होत आहे. विद्यार्थ्यांचे मानसिक आरोग्य, सुरक्षितता तसेच शिक्षक–विद्यार्थी नातेसंबंध अधिक दृढ करण्यासाठी शालेय शिक्षणमंत्री दादाजी भुसे यांच्या संकल्पनेतील ‘सकारात्मक शिस्त’ सर्व शाळांमध्ये प्रभावीपणे राबविणे आवश्यक आहे, असे प्रतिपादन गट शिक्षणाधिकारी अनिलकुमार महामुने यांनी केले.
कोठारी (चि.) येथील मातोश्री कमलताई ठमके इंग्लिश स्कूल येथे नुकत्याच आयोजित गोकुंदा व शनिवारपेठ केंद्राच्या केंद्रस्तरीय शिक्षण परिषदेत ते बोलत होते.
यावेळी गोकुंदा केंद्रप्रमुख उत्तम कानिंदे, केंद्रिय मुख्याध्यापक रवि नेम्माणीवार, शनिवारपेठ केंद्रप्रमुख राम बुसमवार, केंद्रिय मुख्याध्यापक आर. आर. जोशी, मुख्याध्यापक संघटनेचे तालुका सचिव अरविंद राठोड, प्राचार्य प्रमोद मुनेश्वर तसेच शेख शेहबाज उपस्थित होते.
महामुने म्हणाले, की विद्यार्थ्यांमध्ये राष्ट्रप्रेम निर्माण करण्यासाठी संविधानातील मूलभूत कर्तव्यांचा समावेश दैनंदिन परिपाठात करावा. भीती, अपमान किंवा शिक्षा न देता योग्य वर्तन शिकविण्याची विज्ञानाधारित पद्धत म्हणजेच सकारात्मक शिस्त असून, ती प्रत्येक शिक्षकाने अंगीकारणे गरजेचे आहे.
या परिषदेत सकारात्मक शिस्त विषयावर मुक्ता आलेवार, गणित-विज्ञान अध्ययन समृद्धी कार्यक्रम व पुढील दिशा यावर विनय वैरागडे व योगेश वैद्य, बाल सुरक्षा विषयावर राजेश राठोड, तर माता–पालक गट विषयावर अविनाश पिसलवार यांनी मार्गदर्शन केले. तथागत पाटील यांनी संगणकीय सादरीकरणासाठी सहाय्य केले.
कार्यक्रमाचे प्रास्ताविक राम बुसमवार यांनी केले. सूत्रसंचालन उत्तम कानिंदे यांनी केले. यावेळी मेंदू तज्ज्ञ डॉ. पॉल मॅक्लिन यांच्या डाउन शिफ्टिंग सिद्धांताच्या आधारे शिक्षेचा विद्यार्थ्यांच्या मनावर होणारा परिणाम स्पष्ट करण्यात आला.