नांदेड : येथील आंबेडकरवादी मिशनला नुकतीच मान्यवर अधिकाऱ्यांनी भेटदिली. निखिल मेश्राम (आयआरएस, कमिश्नर) आणि अनिता मेश्राम (आयएएस, मुख्य कार्यकारी अधिकारी, अकोला) यांनी मिशनला भेट देत विद्यार्थ्यांशी संवाद साधला व स्पर्धा परीक्षांच्या तयारीबाबत सखोल मार्गदर्शन केले.
यावेळी विद्यार्थ्यांना उद्देशून बोलताना निखिल मेश्राम यांनी कठोर परिश्रम, सातत्यपूर्ण अभ्यास आणि नैतिक मूल्यांची जोपासना यांचे महत्त्व अधोरेखित केले. प्रशासकीय सेवांमध्ये जाण्यासाठी योग्य नियोजन, वेळेचे व्यवस्थापन आणि आत्मविश्वास या बाबी निर्णायक ठरतात, असे त्यांनी नमूद केले.
अनिता मेश्राम यांनी विद्यार्थ्यांना आपली क्षमता ओळखून लक्ष्य निश्चित करण्याचा सल्ला देत ग्रामीण व वंचित पार्श्वभूमीतून येणाऱ्या विद्यार्थ्यांसाठी उपलब्ध संधींबाबत माहिती दिली.
कार्यक्रमात गणेश सावंडकर (एपीआय) यांनीही विद्यार्थ्यांना मार्गदर्शन करताना शिस्त, शारीरिक-मानसिक तयारी आणि सकारात्मक दृष्टिकोन यांवर भर दिला. उपस्थित विद्यार्थ्यांनी प्रश्नोत्तरांच्या माध्यमातून शंका दूर केल्या.
या प्रेरणादायी भेटीमुळे विद्यार्थ्यांमध्ये स्पर्धा परीक्षांविषयी नवचैतन्य निर्माण झाले असून, प्रशासनातील सर्वोच्च पदांपर्यंत पोहोचण्याचा आत्मविश्वास बळावल्याचे दिसून आले.
Tags
||महाराष्ट्र||