ज्येष्ठ साहित्यिक-कलावंत सन्मान योजनेच्या समितीवर बाबुराव पाटील यांची निवड

किनवट : राजर्षी शाहू महाराज ज्येष्ठ साहित्यिक व कलावंत सन्मान योजनेच्या समितीवर किनवट येथील ज्येष्ठ चित्रकार, पत्रकार, वादक व साहित्यिक बाबुराव पाटील यांची निवड करण्यात आली आहे. माजी मुख्यमंत्री तथा खासदार अशोकराव चव्हाण आणि पालकमंत्री अतुल सावे यांच्या शिफारशीवरून ही निवड करण्यात आली आहे.

बाबुराव पाटील हे गेल्या अनेक वर्षांपासून कलावंत म्हणून सर्वपरिचित असून त्यांनी चित्रकला, वादन आणि साहित्य क्षेत्रात उल्लेखनीय कार्य केले आहे. मागील तीन दशकांपासून ते विविध वृत्तपत्र समूहांत बातमीदार म्हणून कार्यरत राहून सामाजिक, राजकीय, सांस्कृतिक व धार्मिक विषयांवर सातत्याने लेखन करत आहेत. त्यांच्या कार्याची दखल घेऊन त्यांना राज्यस्तरीय मानाच्या पुरस्कारांसह विविध सन्मानांनी गौरविण्यात आले आहे.

सांस्कृतिक क्षेत्रात राज्यातील विविध ठिकाणी त्यांनी सक्रिय काम केले आहे. त्यांच्या या योगदानाची दखल घेत माजी मुख्यमंत्री तथा खासदार अशोकराव चव्हाण आणि आमदार श्रीजयाताई चव्हाण यांनी पालकमंत्री अतुल सावे यांच्याकडे समितीवर नियुक्तीसाठी शिफारस केली होती. त्यानुसार पालकमंत्री सावे यांनी बाबुराव पाटील यांची समितीवर निवड झाल्याचे लेखी पत्र जिल्हाधिकारी राहुल कर्डीले यांना पाठविले आहे.

दरम्यान, सोमवारी (ता.२) जिल्हा परिषद नांदेडच्या ग्रामपंचायत विभागाकडून निवडीचे पत्र देण्यात आले. त्यांच्या निवडीबद्दल विविध स्तरांतून अभिनंदन करण्यात येत आहे.