“जाती मोजायच्या की गाडायच्या?” पुस्तकाचे दादरमध्ये प्रकाशन — समाजभान जागवणारे मंथन

मुंबई : पत्रकार मधु कांबळे लिखित “जाती मोजायच्या की गाडायच्या?” या पुस्तकाचे प्रकाशन रविवार, दि. १४ सप्टेंबर २०२५ रोजी शिवाजी मंदिर, दादर येथे उत्साहात पार पडले. या प्रकाशन सोहळ्यात सेक्युलर मूव्हमेंटचे अध्यक्ष व ज्येष्ठ विचारवंत प्रा. गौतमीपुत्र कांबळे, संपादक व विचारवंत ज्ञानेश महाराव, साहित्यिक लक्ष्मीकांत देशमुख, प्रा. अर्जुन डांगळे, दलित महासंघाचे अध्यक्ष प्रा. डॉ. मच्छिन्द्र सकटे, सेक्युलर मूव्हमेंटचे कार्याध्यक्ष व सेवानिवृत्त सहाय्यक पोलीस आयुक्त भरत शेळके, प्रा. आनंद बिडकर आदी मान्यवर उपस्थित होते. प्रकाशनानंतर झालेल्या खुल्या चर्चासत्रात समाजातील जात-धर्माच्या बेड्या, विषमता आणि सामाजिक ऐक्याच्या प्रश्नांवर तीव्र विचारमंथन झाले. या वेळी साहित्यिक, संपादक, पत्रकार, अभ्यासक तसेच राजकीय व सामाजिक चळवळीतील कार्यकर्त्यांनी मोठ्या संख्येने उपस्थित राहून या चर्चेला प्रतिसाद दिला. या कार्यक्रमाने समाजभान जागवणारे आणि प्रगल्भ संवाद घडवून आणणारे व्यासपीठ निर्माण झाल्याचे मान्यवरांनी मत व्यक्त केले.